最近Tabata運動可謂風靡全球,聽講一日做4分鐘就可以達到運動1小時嘅效果,啱晒忙碌嘅都市人,所以有唔少Sis都特登學嚟幫助減肥!想知呢種咁神奇嘅運動到底係咩嚟,又有咩Tabata運動推介?咁就即刻留意以下嘅介紹啦!

 

咩係Tabata運動?

 

Tabata運動係一種高強度間歇式訓練,由一位日本科學家Izumi Tabata發明,本身係用嚟提升奧運滑冰運動員嘅表現,但由於呢種運動可以令人喺短時間之內鍛錬體能同燃燒脂肪,所以火速喺歐美流行,之後仲傳遍全球。Tabata原理係結合有氧同肌力嘅運動,成個過程只需要4分鐘,20秒完成一組動作,之後休息10秒,直到完成晒8組動作為止。

 

睇完心思思都想試下做Tabata?準備好瑜珈墊之後就跟住以下介紹嘅動作做啦~

 

入門級Tabata

 

  1. 開合跳:盡量伸直雙手快速開合跳,最好每次開合跳時兩隻手掌都可以接觸到。
  2. 手碰膝頭:將手舉到同膊頭平排,分別抬高左腳同右腳,令膝頭掂到手掌。
  3. 分腳跪:雙手叉腰,左右腳輪流跪,唔使掂到地下,後腳同地面達到水平位置就得。
  4. 跪姿掌上壓:面向地下,雙腳好似跪緊嘅姿勢咁做掌上壓。

 

將以上動作順序做完之後重覆一次,不過記得每組動作之間都要休息10秒!不過如果你已經去到做完3組Tabata都唔覺得攰嘅程度嘅話,咁就可以做以下嘅進階版啦!

 

進階版Tabata

 

  1. 分腿跪跳雙手叉腰,左右腳輪流跪完跳起。
  2. 深蹲跳:盡量蹲低D,深蹲完之後企起身向上跳。
  3. 深蹲跳+掌上壓雙腳微微張開,膝頭微彎咁企然後蹲低,雙手撐地之後對腳向後跳,做一下掌上壓之後跳起身重複以上動作。
  4. 掌上壓:雙手同膊頭同寬,做掌上壓時留意要用腰力,唔可以條腰貼住地面。

 

如果想再加強嘅話,可以將以上動作總共做4次,亦都可以替換其他動作進行,以針對自己想鍛鍊嘅部位進行訓練~Youtube上亦都有不少教學短片,有興趣嘅Sis不妨去搵下有邊隻適合自己!不過唔好以為一日4分鐘就好輕鬆,做起上嚟都好攰架,所以都要量力而為,做之前同做完之後亦都要注意補充水份!

最近Tabata運動可謂風靡全球,聽講一日做4分鐘就可以達到運動1小時嘅效果,啱晒忙碌嘅都市人,所以有唔少Sis都特登學嚟幫助減肥!想知呢種咁神奇嘅運動到底係咩嚟,又有咩Tabata運動推介?咁就即刻留意以下嘅介紹啦!