身為 OL ,平時喺公司嘅時間隨時仲耐過喺屋企。但成日屈住喺間凍到「雪房」咁嘅冷氣房度,會發現肌膚嘅水份慢慢被抽乾,唔想皮膚乾到裂?就要學識以下嘅 Office 補濕秘訣,隨時為肌膚補充水份啦!

 

一、常備補濕噴霧

 

補濕噴霧可以話係 OL 嘅好 Buddy ,喺覺得 dry 嘅時候拎出嚟噴一噴就即時補充到肌膚嘅水份,仲可以有定妝效果。如果將補濕噴霧噴喺化妝棉或者紙巾上面,輕印喺特別乾嘅位置,例如鼻翼、嘴角等等,更加可以加強補濕效果添!

 

二、洗手後搽 Hand Cream

 

其實唔止塊面,為自己對手補濕都好重要。如果想保養好雙手,記得喺每次洗完手抹乾之後就補搽返 Hand Cream,滋潤返雙手。怕笠而唔搽 Hand Cream嘅 Sis 其實揀返 D 比較清爽又補水嘅 Hand Cream就得!

 

三、放迷你加濕器

 

而家市面上都有好多唔同類型嘅加濕器畀各位 Sis 選購,喺 Office 用嘅話就比較適合用 D 迷你型嘅, USB 插電就用得,細細件又可以周圍攝,唔驚阻住用嚟辦公嘅枱面~

 

四、擺杯熱水喺枱面

 

唔想買加濕器?其實擺杯水喺枱面都得,特別係熱水,佢嘅水蒸氣可以增加返張枱周圍嘅環境濕度,放落保溫杯度打開蓋嘅話效果就更加持久~有需要嘅時候將杯熱水放近少少塊面,利用 D 水蒸氣蒸返 1 – 2 分鐘面都可以減低乾燥感!

 

五、定時飲水

 

點解做足以上嘅嘢都仲係覺得好乾?咁可能係你飲唔夠水啦!唔好喺口渴嘅時候先飲水,因為呢個時候肌膚已經處於缺水狀態,到時先飲就太遲啦!定時飲水嘅話就可以時刻保持肌膚水潤,唔使下下急救。不過記得如果你飲嘅係咖啡、奶茶嘅話反而會有利尿嘅作用,帶走身體嘅水份,所以飲呢類飲品要一杯起兩杯止,之後飲返 D 清水就最好!

 

身為 OL ,平時喺公司嘅時間隨時仲耐過喺屋企。但成日屈住喺間凍到「雪房」咁嘅冷氣房度,會發現肌膚嘅水份慢慢被抽乾,唔想皮膚乾到裂?就要學識以下嘅 Office 補濕秘訣,隨時為肌膚補充水份啦!