Blue Monday係假期後嘅常見後遺症、就算平時點積極係剛番工的星期一都會特別冇心機冇精神,三魂唔見七魄,仲點捱完呢個咁漫長嘅星期呀?既然係咁,暫時放低手頭上嘅工作,整杯健康飲品提吓神,搵返果七魄歸歸位先啦!

 

綠茶與白茶 咖啡以外嘅替代品

 

想提神,大家都會諗起咖啡,不過如果唔適合飲咖啡,或者唔鍾意飲,咁有咩代替?飲落零舍清新可口嘅白茶同綠茶就啱晒,而且由於發酵程度低,佢哋嘅兒茶素含量亦比一般茶高,抗氧化效果特別好,有助消除自由基。

 

不過白茶同綠茶性味偏寒涼,女生們要避免經期期間飲用,平時亦唔適宜飲太多,尤其是本身體質虛寒嘅Sis,想減低寒涼性的話,喺沖泡時加入玫瑰、桂花或者茉莉花,既可平衡性味,亦可提升味道層次,仲可以令心情都好d。

 

花旗蔘茶生津降火 熬夜後最啱飲

 

咁如果唔鍾意飲茶又點好?小編有另一推介,就係花旗蔘。同樣可以提神醒腦之餘,仲養陰、清熱、生津,尤其是熬夜後特別啱飲!大家都明嘅,星期一之前果晚總係瞓得唔好,分分鐘喺張床度碌到半夜先瞓得著,第二朝一早又要起身,個人其實好易陰虛火旺,少少躁有點口乾,又冇乜精神,咁就需要一杯花旗蔘水幫幫你。

 

沖泡法簡單到不得了,只要買啲切好一片片嘅花旗蔘,攞適量(唔需要太多)放入保溫杯或者一般杯,沖熱水,焗大約10分鐘,出味就飲得。味道甘甘哋,都幾好飲架,如果唔習慣陣甘味,落少許冰糖/蜜糖都OK。

 

花草茶狂粉之選 薄荷茶

 

若然你鍾情於花草茶,小編仲有推介,就係睇到個名都精神為之一振嘅薄荷茶。除咗醒腦提神,仲可以舒緩喉嚨痛添,如果喉嚨有輕微痛,可以試吓飲番杯,睇吓改唔改善到。薄荷另外仲有疏肝解鬱嘅作用,抑鬱星期一自然冇咁鬱。

 

不過薄荷茶單飲的話,味道較為單調,未必人人鍾意,所以小編建議將薄荷葉加入熱水沖泡之後,放2片檸檬或者青檸,可以落少少蜜糖,咁樣沖又好飲又夠fresh,個腦都即刻通晒呀!

 

不過始終薄荷都係比較涼嘅香草,擔心佢太涼的話,可以加個紅茶包,或者加玫瑰、桂花或茉莉花一齊沖,咁就享受到薄荷嘅清新醒腦效果,又唔怕太涼。但同樣唔好成日飲同避免經期期間飲啦!虛寒嘅sis就更加要評估自己適唔適合飲啊。

 

呢3種飲品醒神之餘各自有其他唔同嘅功效,總有一種啱你。下星期一,約定你,再介紹多4個喺office都做到嘅簡單小動作,等你以後每個星期一都唔再係藍色!

 

你可能感興趣:

Monday不再Blue:4個朝氣扮工小動作

無濕一身輕 踢走濕氣3大法

 

Blue Monday係假期後嘅常見後遺症、就算平時點積極係剛番工的星期一都會特別冇心機冇精神,三魂唔見七魄,仲點捱完呢個咁漫長嘅星期呀?既然係咁,暫時放低手頭上嘅工作,整杯健康飲品提吓神,搵返果七魄歸歸位先啦!