天氣一開始熱,塊面就開始多油,搞到塊面油光滿面痴笠笠咁,感覺好污糟。但出油其實本來係好正常,因為肌膚都需要一定油脂滋潤,保護皮膚,但如果出得過多,可能你本身因為遺傳屬於油性肌,或者同荷爾蒙分泌有關,亦有機會係皮脂腺出現問題,可能需要睇醫生。不過如果問題唔太嚴重的話,不妨睇睇以下呢8個Dos & Don’ts幫唔幫到你。

 

 

✖ Don’t – 瘋狂洗面

面油多咗再加出汗,又笠又污糟,就成日忍唔住想洗個面,清晒塊面d油,洗完的確清爽好多,令人難以自拔,但千祈唔好一有油就洗面,洗唔停手,洗面過多會對皮膚造成刺激,而且亦會令水份過度流失,令皮膚狀態更差。

 

✔ Do – 簡單護膚

 

雖然面油多令人好懊惱,好想做多d野令自己叮一聲冇晒d油,不過呢個時候切忌急躁,早、晚各洗1次面其實已經好OK,如果出油情況真係好嚴重,中午時用清水洗洗面都可以。無論幾想d油立即冇晒都好,都唔好有咩控油產品就搽晒上面,或者瘋狂做mask,反而應該遵從簡單嘅護膚程序,以免增加皮膚負擔,阻塞毛孔就好易引發暗瘡架喇。

 

 

✖ Don’t – 用有酒精成份skincare

小編好明白好想塊面時刻都咁清爽,但如果用含酒精成份嘅護膚品,其實只會帶走皮膚水份,雖然用後感係爽,但會令皮膚變乾,皮膚狀態反而仲差,即刻check吓用緊嘅skincare有冇酒精啦~

 

✔ Do – 選用質感清爽護膚品

 

其實選用質感清爽、以補濕為主嘅skincare已經OK,太油膩、質感厚重嘅產品就要避免。但唔好諗住唔搽cream/lotion啊,要鎖水唔好俾水份流失就靠佢架喇,揀隻清爽唔油膩就得啦!

 

 

✖ Don’t – 用手摸面

 

小編知道有d sis feel到塊面有油就忍唔住摸,但真係要戒咗呢個壞習慣!手指成日接觸咁多嘢,有好多細菌,一摸上面,塊面又油又有汗咁,就好易成為細菌溫床,令暗瘡爆發。

 

✔ Do – 紙巾輕抹過多面油

 

其實皮膚正常係會出油嘅,所以照一照鏡先,發現皮膚油量好多好閃令令咁,先用乾淨紙巾印一印出油位置,等油脂唔好積聚,以免吸附空氣中嘅灰塵,阻塞毛孔,誘發暗瘡。

 

 

✖ Don’t – 食油膩辛辣食物

 

雖然西醫一般認為飲食同面油多少冇乜關係,不過喺中醫角度嚟睇,就認為多數面油過多嘅朋友體質都偏濕熱,應該避免食太多煎炸油膩、辛辣呢d會上火嘅食物,而且亦要少食生冷同過甜嘅食物,以免增加脾胃負擔,運化唔到水濕。

 

✔ Do – 多吃蔬果+去濕

 

以中醫角度去處理面油問題的話,就要多d食新鮮蔬菜、水果,飲食亦要清淡d,平衡返身體;如果面油情況好嚴重,又有明顯嘅上火徵兆,例如喉嚨痛、便秘等,可以沖菊花茶飲吓,不妨加少許金銀花,增強清熱效果,但如果飲後覺得頭暈或者唔舒服,就要暫停。

 

由於多數人都係濕熱,所以除咗下火,仲要去去濕,詳情可以參考「無濕一身輕 踢走濕氣3大法」。再加上維持正常嘅作息時間,有適量飲水、做運動,身體狀況好咗,皮膚自然都會好。當然有任何疑難/問題,最好都係向中醫師查詢。

 

*每人身體狀況不同,如有問題,請向醫生查詢。

天氣一開始熱,塊面就開始多油,搞到塊面油光滿面痴笠笠咁,感覺好污糟。但出油其實本來係好正常,因為肌膚都需要一定油脂滋潤,保護皮膚,但如果出得過多,可能你本身因為遺傳屬於油性肌,或者同荷爾蒙分泌有關,亦有機會係皮脂腺出現問題,可能需要睇醫生。不過如果問題唔太嚴重的話,不妨睇睇以下呢8個Dos & Don’ts幫唔幫到你。