相信好多Sis都好驚自己個鼻變成「士多啤梨鼻」,為咗清走鼻上嘅黑頭,應該都用盡唔少方法,當中相信都包括不少偏方!既然大家都有清黑頭嘅經驗,咁又知唔知自己一路用開嘅方法啱唔啱呢?即刻試下答以下關於清黑頭嘅問題,睇下自己係咪真係咁叻啱晒啦!

 

可唔可以用手唧黑頭?

 

答:當然唔得啦!因為雙手暗藏好多細菌,用手唧黑頭好易會令皮膚發炎,如果真係要用手唧嘅,最好都係徹底清潔雙手先!但始終都係唔建議,因為好易會令到毛孔越嚟越大!

 

鼻貼去黑頭快靚正?

 

答:好多人會就咁用鼻貼去黑頭,撕落嚟嗰下當然爽歪歪,不過就咁用鼻貼,冇其他相應嘅清潔、護理程序嘅話,清除嘅黑頭都只會係表面嗰D,好快就會返番嚟!毛孔亦都會越嚟越大添!

 

用去角質產品可以清黑頭?

 

答:去角質產品其實都係清除咗表面嘅角質,係清唔走黑頭,如果要清黑頭嘅話應該用完去角質產品之後再用其他清除黑頭嘅產品先至有效~

 

清完黑頭就可以跟返正常護膚程序?

 

答:清完黑頭之後,由於毛孔已經張開咗,所以最重要嘅第一步係要用返收毛孔嘅產品先,例如緊緻毛孔嘅爽膚水咁,如果唔係就好快會積聚返D污垢,黑頭又返番嚟啦!

 

每日用凍水洗面可以預防黑頭形成?

 

答:啱一半,其實一開始洗面應該用溫水洗30秒左右,張開咗毛孔先,用完潔面產品之後再用凍水洗乾淨,咁就可以收緊返D毛孔啦!每日持之以恆,就會發現黑頭比以往少咗好多!

 

清黑頭要隔幾日做一次?

 

答:冇錯!由於清黑頭嘅過程,或多或少都會刺激到皮膚,所以每次清黑頭最好都係隔3日或以上就最保險,以免脆弱嘅肌膚承受唔住!

要正確咁清除黑頭,最緊要都係事前要適當咁令肌膚毛孔張開~用溫和嘅潔面產品洗面,再用黑頭導出液或者黑頭貼等嘅產品清黑頭,清完黑頭之後再用緊膚水收緊毛孔,咁先可以清到深層黑頭之餘又唔會擴大毛孔!

 

相信好多Sis都好驚自己個鼻變成「士多啤梨鼻」,為咗清走鼻上嘅黑頭,應該都用盡唔少方法,當中相信都包括不少偏方!既然大家都有清黑頭嘅經驗,咁又知唔知自己一路用開嘅方法啱唔啱呢?即刻試下答以下關於清黑頭嘅問題,睇下自己係咪真係咁叻啱晒啦!