復活假眨吓眼就完咗,4日假留都留唔住,但假期同朋友食食埋埋嘅大量美食,就可能仲留喺個肚度,搞到飽飽滯滯,成個人更加冇心機。即刻睇吓呢4招幫唔幫到你消消滯、解解膩,令腸胃快d復活!

 

三餐輕食 清淡易消化至上

 

 

要舒緩飽滯,首要任務當然就係要食得清淡同容易消化嘅食物啦!呢幾日三餐不妨食少d高蛋白質食物,多d食麥皮、低糖低卡粟米片、粥,又或者食吓湯河粉、米線、米粉呢類比較易消化嘅粉麵類,清新嘅沙律都係唔錯嘅選擇,不過沙律屬於生冷、涼性食物,女生們最好就唔好一早食同成日食,間中一次半次就冇乜所謂。

 

新鮮生果落肚 清爽解滯

 

除咗食得清淡d,仲可以多d食生果。新鮮生果唔止清爽,仲含有豐富纖維,可以促進腸道蠕動,幫助消化,當中菠蘿同木瓜仲含有豐富酵素,可以幫助分解蛋白質,更加有效解膩滯感。

 

山楂消脂解膩 焗一焗就飲得

 

如果真係好滯的話,大家不妨善用消脂解膩嘅山楂焗水飲:做法好簡單,喺office都整到架,拎幾片山楂乾放入保溫杯,用熱水沖焗約20-30分鐘,等佢出味就OK,可以就咁飲,酸酸地夠醒胃,亦可以加少許冰糖調味,酸酸甜甜仲好味。

 

飯後一杯茶 消滯又去膩

 

如果覺得準備山楂比較麻煩,其實都可以選擇食完飯之後約1小時飲杯茶,當中又以性溫嘅普洱茶效果特別好,解膩之餘仲養胃;如果體質偏向熱底,可以加少許菊花平衡一下。若然唔太喜歡飲普洱,鐵觀音嘅消滯功效都唔錯架。

 

飲食上落手之餘,再配合適量輕度運動,幫助腸道蠕動,自然就事半功倍,好快就唔再頂住頂住。但如果真係好唔舒服,或者腸胃本身有病痛、易敏感,當然都係盡快睇醫生。

 

你可能感興趣:

無濕一身輕 踢走濕氣3大法

Monday不再Blue:健康醒神飲品篇

復活假眨吓眼就完咗,4日假留都留唔住,但假期同朋友食食埋埋嘅大量美食,就可能仲留喺個肚度,搞到飽飽滯滯,成個人更加冇心機。即刻睇吓呢4招幫唔幫到你消消滯、解解膩,令腸胃快d復活!