盛夏熱辣辣,個人都特別容易熱氣,周不時爆瘡、喉嚨微微痛、生痱滋等。呢個時候,大家自然諗到要清熱下火,例如飲涼茶、啤酒、食龜苓膏等,但可能隨時墮入誤區都唔知,等小編即刻同大家解構!

 

涼茶清熱一定啱飲?

 

小編身邊有唔少朋友一feel到自己熱氣,就會去涼茶舖飲返碗涼茶,仲覺得越苦越有用,例如苦過dee dee嘅廿四味就有好多人捧場。雖然涼茶的確係用嚟清熱,不過要留意嘅係,現代人嘅熱氣好多時都屬於虛火,即係由於陰虛而導致火氣較盛,因為多數人都係坐多,少大量體力勞動,而多數涼茶清嘅係實熱,對普遍體質虛嘅人嚟講就唔多適合喇。

 

可能你會話,大家都是熱氣,不用分那麼細,但係本質上兩者係完全唔同,如果用清實熱嘅涼茶清虛火,可能會越飲越虛,不但清唔到熱,身體仲可能差咗,尤其是廿四味,配方間間唔同,材料多之餘,大多數仲屬於好苦寒嘅材料,唔係人人身體都頂得住架,千祈唔好亂咁飲。

 

食盅龜苓膏,熱氣速速走?

 

去到涼茶舖諗住清熱,點知話廿四味可能好傷身,咁唔飲啦,食龜苓膏又如何?冇廿四味咁難入口,好似啫喱咁,實食得啦?咁又錯喇,龜苓膏一樣係苦寒食品,同廿四味同一道理,唔係人人啱食,最好都係唔好亂咁食,小心清熱不成反傷身。

 

「鬼佬涼茶」好下火?

 

好啦,咁唔飲傳統涼茶,飲「鬼佬涼茶」啤酒又得唔得呢?一杯冰涼啤酒落肚,加埋氣泡嘅衝擊,個人即刻爽晒,喉嚨都好似即刻冇咁痛喎,係咪有用呀?其實可能只係因為冰凍感覺令喉嚨痛暫時得到舒緩,飲酒其實會傷肝,凍飲又傷脾胃,而且酒精仲會帶走身體水份,清熱就冇咩用喇,分分鐘令人更乾更燥,對身體又唔好。

 

清熱沖劑夠天然?

 

而家著重方便,大家未必得閒專登去涼茶舖,就會選擇市面上隨手都買到嘅清熱沖劑或者樽裝清熱飲品,咁又work唔work?一般嚟講,呢類飲品都提取一d有助清熱嘅成份製作,性質唔會太寒涼,但多數為咗好飲d,就會落好多糖,同埋加入添加劑,變得冇咁健康。再加上清熱成份未必足夠清到熱或者一定適合每個人嘅身體情況,所以最好都係唔好依賴呢d飲品。

 

想唔好咁熱氣,先由改善生活習慣入手:唔捱夜、多飲水、少食煎炸油份多嘅食物、多食蔬果,輕微虛火可以試沖杯菊花茶或者綠茶飲(都未必人人啱飲架,要視乎身體情況而定),或者煲d滋陰生津又下火嘅湯水/茶飲,改善陰虛津液不足,火氣自然慢慢消除,嚴重或者維時好耐,就最好見一見中醫師啦~

 

*資料只供參考,如有任何疑問,請向中醫師查詢。

 

你可能感興趣:

減肥但又口痕? 4 種高營養堅果推介

唔好再上當!7 種唔健康的「健康食品」!

盛夏熱辣辣,個人都特別容易熱氣,周不時爆瘡、喉嚨微微痛、生痱滋等。呢個時候,大家自然諗到要清熱下火,例如飲涼茶、啤酒、食龜苓膏等,但可能隨時墮入誤區都唔知,等小編即刻同大家解構!