有冇sis睇咗《29+1》?小編之前睇咗優先場,睇到最後,見到一直以來好忙好多意外嘅林若君(周秀娜飾)喺離開29歲之前,頃刻間心靈澄明,認清自己想要乜嘢,睇清楚身邊嘅人,雖然好痛,但係唔再一味忙而唔知自己為咗乜咁,覺得好感動。

 

我哋或多或少都好似林若君咁,生活上經常性有好多大大小小嘅事情要處理,不停忙但又唔知為乜而忙;好似擁有好多嘢,但其實唔知自己想點,尤其當走到去好似係女人大限之際嘅3字頭,更加覺得自己好似夠鐘要完成任務——結婚、生仔、湊BB……面對好多唔知係自己想做定係人哋帶嚟嘅壓力,衍生好多迷茫、好多情緒、好疲憊、好混亂、好迷失,搵唔到出口。

 

電影中嘅林若君係因為開始睇黃天樂(鄭欣宜飾)嘅日記,而慢慢領略到人生可以有好多選擇同方向,咁我哋呢?不如試吓走出自己嘅日常,唔再淨係一有空閒就行街、食飯、唱K,做d平時唔會做嘅嘢,安靜而專注咁自己做一件事,自然就能夠清除內心嘅躁動、煩惱、不安,撫慰心靈,令情緒平和,從而慢慢了解自己想追求乜嘢。小編先拋出5個建議,大家如果有更多推薦,不如留言俾各位sis都參考吓~

 

畫畫

 

雖然大家可能會覺得「吓!我淨係識畫火柴人,我畫畫冇天份架喎」,但小編身邊就有位朋友,從來冇畫過畫,但去上油畫班之後,慢慢喺導師指導下學習繪畫技巧,都畫到一幅幅佢好滿意嘅作品。其實只要有興趣,就唔好被自己「我唔得架」限制咗,試咗先,專心咁學習,睇吓自己除咗火柴人,會唔會畫到你意想不到嘅畫作?

 

書法

 

畫畫以外,練習書法都係個唔錯嘅選擇,無論係西方鋼筆書法,抑或係中國傳統嘅毛筆書法都好,當你專注喺筆尖,睇住墨水喺紙上慢慢咁一筆一劃寫出唔同形態嘅字,心境真係會即刻平靜落嚟,原本複雜混亂嘅思緒自然就會消散。

 

陶藝

 

製作陶瓷需要高度嘅專注力,手、腳、眼、腦嘅配合缺一不可,如果唔係,就好難做到你理想中嘅作品。而且親手將唔起眼嘅陶泥逐步逐步製成一件件實實在在、睇得又用得陶瓷製品,滿足感都幾大架。

 

插花

 

若然喜歡花花草草,不如考慮吓學插花?認識不同品種嘅花、學習唔同花種嘅配搭同插法,參照吓唔同人嘅作品,自己又加以學習,發揮你嘅想像力同創造力,完全可以將刻板嘅生活感覺一掃而空,況且見到賞心悅目嘅花人都開心d。

 

瑜伽

 

瑜伽係一個講求身、心、靈合一嘅運動,而唔淨係修飾身體線條咁簡單,真正嘅瑜伽更會注重心靈上嘅修鍊,令人從內到外都可以咁平和。過程中你要專注喺自己嘅動作同呼吸,每一個動作都係緩慢唔急速,好似瞬間靜止咗全世界咁,修身之外更可以修心,好好享受瑜伽帶來嘅慢靈魂。

 

其實仲有好多選擇,只要係靜靜哋、令你嘅注意力集中,定期進行,等你可以喺一片煩囂庸碌之中搵到個真正休息嘅時間就可以,過程中仲可能意外發掘到自己未知嘅才華/能力添。只要心靈澄明,情緒就會平和快樂,可以坦然安穩咁面對自己,自然就能夠一步步理清思緒,搵出路向,甚麼3唔3字頭,根本就唔重要,只不過就係29歲,加多1咋嘛!最重要都係了解自己,活得開心自在,就好似黃天樂咁,30歲咪就係做呢樣嘢嘅時候囉~共勉!

 

你可能感興趣:

Bloom Yourself:春夏繁花美容攻略

嚴選優質$350樓下全身按摩

假日與閨蜜約會 4 個好方案

有冇sis睇咗《29+1》?小編之前睇咗優先場,睇到最後,見到一直以來好忙好多意外嘅林若君(周秀娜飾)喺離開29歲之前,頃刻間心靈澄明,認清自己想要乜嘢,睇清楚身邊嘅人,雖然好痛,但係唔再一味忙而唔知自己為咗乜咁,覺得好感動。