又嚟到一年一度食月餅、玩燈籠嘅中秋節啦~相信好多Sis最期待都係同親人、朋友一齊食月餅嘅歡聚時間!尤其係而家D月餅越出越多款,除咗傳統嘅蛋黃、蓮蓉、豆沙等等嘅味之外,又有冰皮、雪糕、生果味同流心等等嘅月餅,真係花多眼亂。要試晒佢,容乜易磅重嗰陣先驚覺重咗幾KG?!想應節得嚟又唔會肥?即刻睇下有咩方法啦!

 

方法一:揀低卡月餅

 

如果各位Sis冇特別偏好食邊種月餅嘅話,最好就係揀冰皮月餅嚟食!因為冰皮月餅對比起傳統月餅嚟講,卡路里足足可以低成100克架!如果想再健康D嘅話,五仁月餅更加係一個好選擇!因為五仁月餅入面冇加到蓮蓉,自然冇咁多糖,而果仁又夠晒高纖,仲含有健康嘅脂肪酸,簡直係最健康嘅月餅之選!

 

方法二:用茶送月餅

 

食月餅嗰陣最好都係唔好用汽水或者有糖份嘅飲品送,因為月餅本身已經含有唔少糖份,加埋呢D飲品就可能會攝取過多嘅糖份啦~所以最好都係用茶送月餅,無糖之餘又可以消脂解膩!如果食嘅月餅係比較甜嘅話,最好就係飲返杯綠茶去中和甜膩感;而如果食嘅月餅係油膩D嘅,最好就係飲普洱或者菊普、山楂茶去消除油膩感,仲可以下火添~

 

方法三:唔好月餅當正餐

 

有D Sis貪方便時,可能會將月餅當正餐咁食,但其實月餅係高脂、高糖食物,咁樣可能會攝取咗過多卡路里同糖,又唔健康又會致肥!所以最好都係將月餅當下午茶,揀D迷你月餅就更加好,過到口癮得嚟又唔驚會攝取得過多嘅卡路里同糖份~想減肥嘅話,更加應該剩係食半個迷你月餅或者6份1個傳統雙黃蓮蓉月餅!而喺晚飯前後食月餅嘅話,最好都係因應情況,減少飯量食多D菜~

 

方法四:食高纖水果同做運動

 

唔小心食多咗月餅咁點算?要減少食多咗月餅嘅罪惡感,最好嘅方法係做運動!食完月餅之後預返20-30分鐘時間做運動,就算係急步行都得架,都可以幫助消耗返月餅帶嚟嘅熱量。而食完月餅之後,食返D蘋果、梨或者橙等嘅高纖水果,既可以幫助消化,亦都可以增加飽肚感,咁就唔驚自己會一啖接一啖咁停唔到口咁食月餅啦!

 

所以話,好味嘅嘢都係要節制住咁食,尤其係月餅呢D高熱量同高糖嘅食物,食得太多好可能會影響健康!但跟住以上嘅方法,就可以安安落落賞月,喺應節嘅同時又可以keep住健康嘅體態,唔使擔心之後要地獄式減肥啦~

又嚟到一年一度食月餅、玩燈籠嘅中秋節啦~相信好多Sis最期待都係同親人、朋友一齊食月餅嘅歡聚時間!尤其係而家D月餅越出越多款,除咗傳統嘅蛋黃、蓮蓉、豆沙等等嘅味之外,又有冰皮、雪糕、生果味同流心等等嘅月餅,真係花多眼亂。要試晒佢,容乜易磅重嗰陣先驚覺重咗幾KG?!想應節得嚟又唔會肥?即刻睇下有咩方法啦!