雖然天氣仲係好熱,不過中秋節就提醒咗我哋秋天就嚟到啦~一轉季,D皮膚就會好唔聽話,甩皮、敏感面紅等咩都出晒嚟!唔想等出事先嚟急救,咁就要防患於未然,唔好等到面紅紅先對住塊鏡喊咁口啦!唔同膚質都有唔同嘅轉季護理方法,唔可以一招獨步天下,睇清楚自己係咩膚質,再揀返適合嘅方法嚟跟住做啦!

 

乾性肌膚

 

屬於乾性肌膚嘅Sis喺入秋嘅時候要更加著重補濕嘅功夫!而且喺補水之餘亦都要補充油分,如果唔係就keep唔住D水分喺皮膚度,補極都冇用架啦!所以最好就係用一D含有油分嘅潔面同護膚產品,鎖住皮膚嘅水分,咁就唔驚肌膚乾到裂啦~

 

油性肌膚

 

油性肌膚嘅Sis喺轉季嘅時候應該暫時停用控油產品,著重補充肌膚嘅水分,用含水性嘅補濕產品就最好啦~另外由於油性肌膚好容易會堆積老廢嘅角質層,所以亦都應該定期用返去角質嘅產品,幫助維持肌膚嘅水油平衡!

 

混合性肌膚

 

混合性肌膚嘅Sis通常係T字位油脂分泌比較旺盛,所以T字位同面部其他部位係應該用唔同嘅護膚產品去處理!T字位應該用清爽嘅補濕產品,其他部位就應該用比較滋潤嘅產品,而T字位亦都應該加強去角質,每星期做一次左右就啱喇!

 

敏感性肌膚

 

擁有敏感性肌膚嘅Sis喺轉季嘅時候就要特別小心啦,因為比起其他人更容易有泛紅、甩皮同乾燥嘅情況出現,有咩唔妥都立即喺塊面度顯現晒出嚟!要轉季轉得安安落落?最好就係停止用含有酒精同香料等嘅產品,用返D比較冇負擔嘅補濕產品,例如有透明質酸、甘油等成分嘅產品,如果可以轉用一D經測試嘅低敏產品就更加好啦!

 

除咗以上嘅tips之外,轉季時亦都記得唔好用熱水沖涼洗面,沖完涼要把握黃金護膚時間盡快護理肌膚,平時要繼續注意防曬、補充身體水分,食多D新鮮水果同埋蔬菜,由內到外咁護理,咁就更加萬無一失啦!

 

雖然天氣仲係好熱,不過中秋節就提醒咗我哋秋天就嚟到啦~一轉季,D皮膚就會好唔聽話,甩皮、敏感面紅等咩都出晒嚟!唔想等出事先嚟急救,咁就要防患於未然,唔好等到面紅紅先對住塊鏡喊咁口啦!唔同膚質都有唔同嘅轉季護理方法,唔可以一招獨步天下,睇清楚自己係咩膚質,再揀返適合嘅方法嚟跟住做啦!