減肥幾乎係每個女仔嘅終生事業,特別係到咗要出動短衫短褲嘅炎炎夏日,就更加著急要修身。不過越係急,越想快d見效,就越容易墮入減肥陷阱,越減越唔健康,小編今次就同大家分享吓有乜減肥謬誤,希望大家修身之餘都瘦得健康!

 

陷阱1:唔可以食飯

 

成日聽到減肥朋友講「我唔食飯呀,咁多澱粉質好肥」,其實係大錯特錯,只要唔好食得過量,攝取足夠碳水化合物有助提升飽足感,個人飽肚d,自然會食少d立雜嘢。唔食飯雖然少吸收咗碳水化合物,但好易因為咁令你肚餓而食其他零食充飢,反而更冇營養,熱量亦更高,仲肥!而且過多調味料同油份烹煮先係令飯變得邪惡嘅元兇,所以要揀清淡、少汁、少油嘅餸菜配搭或製法;另外可以選食加入糙米嘅飯,降低淨白米飯嘅升糖指數,飽足感更持久,營養更全面。

 

陷阱2:淨係食菜

 

除咗唔食飯,仲會諗「淨係食得沙律同烚菜,唔可以食肉」,其實係唔駛清心寡慾到咁嘅,尤其如果你本身唔係全素食者,突然完全唔食肉係未必咁易適應到;加上喺冇計劃同一定認識嘅情況下,唔識點樣配搭素食的話,營養攝取會唔夠全面。你或者減到磅,但可能只係因為能量同營養攝取不足,結果要消耗你本身嘅肌肉,個人雖然瘦咗,但一d都唔健康,可能好易見暈、皮膚變差、缺乏氣力、精神不足等。用少油方法烹煮嘅低脂肉類食少量其實冇問題,好似去皮雞肉、瘦豬肉、魚肉、蝦等。想轉全素食亦OK,但要循序漸進,識得兼顧唔同營養嘅吸收。

 

陷阱3:零脂肪是最好的

 

驚食肉只食菜嘅另一原因係大家都好怕脂肪,所以拒絕食任何有脂肪嘅食物。雖然脂肪過多會令人肥、增加患病風險,但身體其實需要一定脂肪維持正常運作,部份油溶性營養素亦需要脂肪先可以被吸收,所以完全唔攝取脂肪係唔OK的,道理同你護膚唔可能唔搽cream一樣,冇油份滋潤點得架?不過脂肪有分好壞,拒絕飽和脂肪同反式脂肪呢d壞脂肪係正確的,一般見於全脂奶、紅肉、牛油等。好脂肪如橄欖油、牛油果、果仁、三文魚等就可以食,不過都唔可以食太多架。

 

陷阱4:食少一餐減好多

 

又有人覺得「skip一餐,食少咗咪得囉」,於是最常見就係skip早餐,反正朝早想瞓耐d,又趕住返工,唔食仲方便!不過咁做一d都唔健康,早餐係每個人最重要嘅一餐,經過一晚睡眠之後我哋已經好長時間冇食物落肚,呢個時候更加需要食物提供能量,食豐富d都唔怕,因為身體仲有成日時間去消耗。

 

咁係咪可以唔食其他餐呢?又唔係喎,人體每日都需要一定能量維持正常運作,唔會只係食一餐就足夠,而且亦會影響身體機能,反而能夠做到少食多餐係最好嘅,做唔到亦唔緊要,一日三餐,定時定量均衡飲食,唔食得過高熱量就可以。

 

陷阱5:絕體絕命戒零食

 

好似上面咁講,少食多餐嘛,有時餐與餐之間有少少肚餓,食少許零食唔係問題,但要識揀,唔好食d垃圾食物,即係薯片、蝦條、糖果等等只會徒添熱量又冇營養嘅食物,揀d健康零食頂吓肚,例如原味果仁、低脂低糖乳酪、生果等就OK,完全唔俾自己食嘢令心情唔好,咁減法都唔會健康。當然啦,食得唔等於可以狂食,唔係一樣會肥。

 

跳出呢d陷阱,均衡飲食,唔好食得過量,聽明選擇有益食物,配合適量運動,自然就會瘦,唔好一味諗住要快速見效,擁有健康均稱嘅身材係要時間煉成的,姊妹們,我哋一齊加油!

 

你可能感興趣:

4招消滯解膩 復活腸胃

春天又嚟啦! Let’s Start 減肥!

Monday不再Blue:健康醒神飲品篇

減肥幾乎係每個女仔嘅終生事業,特別係到咗要出動短衫短褲嘅炎炎夏日,就更加著急要修身。不過越係急,越想快d見效,就越容易墮入減肥陷阱,越減越唔健康,小編今次就同大家分享吓有乜減肥謬誤,希望大家修身之餘都瘦得健康!