係女仔都想雙唇時時刻刻都咁 Q 彈嫩滑~可惜秋冬一到,濕度低,皮膚比較脆弱,好多 Sis 都好著重護理皮膚,往往就忽略咗其實唇部都要好好護理,唔理佢嘅話,嘴唇就隨時乾燥脫皮乜都齊!想搵返水嫩嘅嘴唇?即刻睇下以下嘅秘訣啦!

 

一、唔好用手撕死皮、舔嘴唇

 

好多人見到個嘴脫皮就會不自覺咁用手撕走佢,呢個壞習慣千祈要改!因為就咁撕走 D 死皮嘅話,隨時會令到唇部膚色暗沉,更加可能會撕到個嘴流血,感染細菌架!而舔嘴唇呢個習慣都係要改!因為舔嘴唇只會為個嘴帶嚟好短暫嘅濕潤感,但當口水蒸發嘅時候就會將嘴唇本身嘅水分都蒸發埋,越舔越乾!

 

二、隨時補搽潤唇膏

 

平時出門在外,最好都係袋定枝潤唇膏喺身,一覺得個嘴乾就補搽,咁就唔使又撕又舔搞到個嘴傷晒!咁點揀潤唇膏好呢?除咗揀自己鍾意嘅味道同款式之外,最好都係留意一下潤唇膏有冇防曬同維他命 E 成分。唇部肌膚其實係好容易吸收到紫外線,所以揀返 D 有 SPF15 嘅防曬潤唇膏嘅話,就可以防止嘴唇因為紫外線而令唇紋加深!而維他命 E 係比較滋潤嘅成分,嘴唇比較乾燥嘅 Sis ,記得要揀含有維他命 E 嘅潤唇膏先夠補濕架~

 

三、唇部去角質

 

為免死皮積聚,一星期幫嘴唇做一次去角質係最理想~而且唇部皮膚比較脆弱,所以用返嘴唇專用嘅去角質產品就最好!不過如果嘴唇已經好乾裂嘅話,就唔好用呢種方法喇,最好就係用熱毛巾敷嘴唇 3 至 5 分鐘,之後再用柔軟嘅刷慢慢刷走 D 死皮!

 

四、瞓前保養

 

瞓覺簡直就係保養嘴唇嘅黃金時間,瞓之前做少少功夫,一起身就可以搵返水嫩嘅嘴唇,何樂而不為?瞓之前搽一 D 專用嘅唇部夜間修護產品,瞓醒就會發現甩皮情況好咗好多!如果想急救嘅話,訓之前厚搽凡士林,驚痴笠笠嘅話就再加塊保鮮紙喺上面,一起身就會發現 D 死皮輕輕抹都抹得走!經濟又實惠,不妨試下呀!

 

做足以上 4 樣嘢嘅話,就會發現 Q 彈嫩滑嘅嘴唇好輕鬆就返返嚟!加埋平時飲多 D 水,補充返身體嘅水分,就唔驚同人傾傾下偈會畀人問做咩個嘴乾到咁啦!

係女仔都想雙唇時時刻刻都咁 Q 彈嫩滑~可惜秋冬一到,濕度低,皮膚比較脆弱,好多 Sis 都好著重護理皮膚,往往就忽略咗其實唇部都要好好護理,唔理佢嘅話,嘴唇就隨時乾燥脫皮乜都齊!想搵返水嫩嘅嘴唇?即刻睇下以下嘅秘訣啦!