春天一到,周圍又濕、又笠,無論係空氣,定係皮膚,抑或係身體內部,都好似俾水氣重重包圍,搞到人精神差、個身又攰又重、成日想瞓覺唔願郁、水腫,甚至連臭臭都好黏膩等等。有冇發現自己呢排都係咁?咁就係時候要去一去濕,等個人輕盈d,舒爽d!

 

豆豆除濕氣

小編首先推介一款三豆去濕湯俾大家,材料好簡單,分別係赤小豆、薏米同扁豆,食材都好易買又易整,最緊要平,而且性質溫和,大部份人都啱食,如果嫌買齊三種豆麻煩的話,呢三種豆單獨煮亦冇問題,好有彈性。

 

 

 

介紹吓呢三款豆先,紅色嘅赤小豆睇落同紅豆有少少似,不過相比紅豆,佢冇咁圓身,而係帶幼長身,顏色亦比紅豆較為暗紅少少,利水除濕作用非常強勁,有效消水腫,如果有 Sis 水腫比較嚴重的話,赤小豆可以落多少少。

 

 

至於薏米除咗去濕,仲可以健脾清熱添,想去濕功效好,又想清熱的話,最好揀生薏米(上圖),即係中間有條啡色凹痕嘅;外型如果好似爆谷咁爆開,就係炒過嘅熟薏米,去濕功效冇咁強,但健脾功效更佳,健脾可以令身體有效咁運化水濕,幫助排走體內濕濁之氣,所以熟薏米都好有用架,不妨兩溝一齊用。

 

但由於生薏米性味偏涼,如果大家脾胃比較虛弱,容易肚痛、手凍腳凍,可以落少d,或以熟薏米代替。

 

至於白扁豆除左化濕,亦有健脾、消暑嘅功效,如果再遲d到夏天,不妨落多些少,去濕之餘仲可以清清暑熱,小編私心覺得加咗白扁豆煲出嚟嘅湯水味道仲特別好飲。

 

做法好簡單,三種豆各拎適量,夾埋大約係平時食飯嘅飯碗大半碗至1碗左右,洗乾淨,煲之前可以浸大約30分鐘-1個鐘,等d豆容易煮腍,冇時間的話都可以直接煲。水量大概8-10碗,視乎豆嘅多少,用大火煮滾後轉細火慢慢煲,大約1個半小時-2小時,直至豆豆腍同出味就飲得!飲湯之餘,記得食埋d豆啊,有豐富纖維同優質蛋白質,健康又有營。

 

做運動出一身汗

 

除咗食嘢,唔少得嘅又係做運動。運動可以幫助燒脂減肥就係人都知,其實透過運動帶動全身嘅氣血循環,仲可以幫助帶走濕氣!唔需要好劇烈,只要令自己微微出汗就OK!

 

如果本身唔係做開運動,更加唔適宜做得太劇烈,簡單落街急步行、行吓樓梯、游水,就算係拉筋都好,都冇問題,最緊要郁,出吓汗。出咗汗記得要抹乾,唔好等佢自己吹乾,如果唔係又會令濕氣走返入體內架喇。

 

拔罐拔出一身輕

 

中醫嘅傳統方法——拔罐都係個效果出色又大部份人都適用嘅去濕方法!醫師將一個個燒熱嘅火罐吸喺身上,多數都會放喺肩、背部,只要10分鐘左右,濕氣就會隨住火罐拔起而帶走,身上一個個紅印就係代表住你嘅濕氣。雖然醜樣d,但真係即時有全身鬆咗嘅感覺,絕對值得一做架。

 

濕氣一走,就冇咗d好重好聚嘅感覺,人又冇咁腫,真係會輕盈好多,又精神好多,真係要時時留意住幫身體去濕呀!

 

*每人身體狀況不同,如有任何不適/問題,請向醫生查詢。

 

你可能感興趣:

4招消滯解膩 復活腸胃

29+1重「心」出發 5個心靈療癒活動推薦

春天一到,周圍又濕、又笠,無論係空氣,定係皮膚,抑或係身體內部,都好似俾水氣重重包圍,搞到人精神差、個身又攰又重、成日想瞓覺唔願郁、水腫,甚至連臭臭都好黏膩等等。有冇發現自己呢排都係咁?咁就係時候要去一去濕,等個人輕盈d,舒爽d!