天氣開始轉涼,意味住冬天好快會嚟啦!唔少Sis一到冬天就諗住可以靠D厚衫遮住,咁就可以食多D嘢,儲脂肪過冬,其實咁樣係會白白浪費咗冬天呢個減肥黃金時期!想喺冬天都減到肥,keep住靚靚身形?咁就要留意以下介紹啦!

 

點解冬天最適合減肥?

雖然成日話冬天會特別容易肚餓,食多咗嘢就好易肥,但其實因為冬天溫度低,人體會自己透過燃燒熱量產熱,令身體維持約37度嘅體溫,所以冬天燃燒嘅熱量比夏天多,自然更適合減肥!再加上冬天雖然胃口大增,但若然可以喺冬天維持到均衡飲食同做運動嘅習慣,將呢個習慣帶埋落夏天自然更加容易,亦唔會喺夏天著少咗衫嘅時候先臨急臨忙減肥減壞身子,所以想開始減肥嘅話,冬天先至係首選!以下4大法幫各位Sis喺冬天都可以實行減肥大計!

 

第一法:揀啱食物嚟食

 

因為天氣凍,好容易會食多咗嘢去維持身體所需,想控制飲食,最好就係一開始就揀一D暖胃嘅嘢嚟食,例如熱湯同熱粥等;打邊爐最好揀清湯或者藥膳湯底,食少D 丸類呢D加工食物,食多D菜;揀嘢飲都要盡量揀熱飲,不過當然要留意返唔好落咁多糖啦~冬天都可以食多D維他命B嘅食物,例如豬肉、豆類、綠色蔬菜等,可以幫助促進新陳代謝同埋分解脂肪同蛋白質,令你嘅減肥大計事半功倍!

 

第二法:做多D室內運動

 

冬天最令人卻步嘅就係做運動,無論之前幾咁勤力落街跑步,一到冬天都即刻唔想郁!呢個時候就要揀D室內運動嚟做啦,去gym room做下gym、室內游泳池游水、屋企做瑜珈,甚至行下樓梯同商場都可以補返唔夠嘅運動量!

 

第三法:浸浴或浸腳

 

冬天個人通常都沾寒沾凍,沖涼時最好就係浸多D熱水浴,臨瞓前如果可以浸10分鐘腳就更好,可以促進新陳代謝又可以暖身,一舉兩得!浸浴時仲可以輕輕按摩一下想瘦嘅部位,例如手臂、腳同腰部等,咁效果會更顯著~不過如果有心臟病、高血壓、哮喘等疾病嘅話浸浴時就要小心D唔好浸咁耐,亦都要注意浴室要通風!

 

第四法:常備健康零食

 

唔好以為要減肥就唔食得零食,因為冬天消耗能量比較快,所以都會比較容易肚餓,如果唔準備定一D健康嘅零食肚餓嘅時候咬下,到食正餐時大吃大喝就弊啦!零食最好都係揀一D健康嘅,例如原味乾果、堅果、水果同牛奶等,咁就解到一時餓意之餘又唔會破壞減肥計劃啦!

 

想喺冬天都減到肥就要跟住以上4大法嚟做啦~持之以恆,將4大法養成習慣,咁一到夏天就唔使驚D鬼崇肉出晒嚟,要日日捱餓減肥,搞到身體差晒又冇厘精神啦!

 

天氣開始轉涼,意味住冬天好快會嚟啦!唔少Sis一到冬天就諗住可以靠D厚衫遮住,咁就可以食多D嘢,儲脂肪過冬,其實咁樣係會白白浪費咗冬天呢個減肥黃金時期!想喺冬天都減到肥,keep住靚靚身形?咁就要留意以下介紹啦!