相信減肥對所有 Sis 都係一件好煩腦嘅事,包括小編自己都係!有時候減肥好多野都要戒口,仲要有好多野都唔食得添,油又話唔得,高澱粉質又話唔得,咁甜品又得唔得?原來得架!!!

當你見到甜品嘅時候究竟食定唔食好呢?甜品實在太吸引啦,但又似會好肥易喎…今次小編我就搵左幾款減肥都食得嘅甜品比大家,全因為佢地低卡又健康。所以就唔洗怕啦!

 

蒟蒻大菜糕 (約 70 卡路里*)

 

蒟蒻係非常低卡嘅一種食物,每 100 克只有 20 卡路里,而蒟蒻仲可以降低膽固醇同血壓水平架,低卡得黎仲咁健康添!而大菜糕成份中 90% 都係水份,其餘既都係膳食纖維,而且低熱量,食完都唔會咁易肥!

 

鮮果涼粉 (約 80 卡路里*)

 

好多人誤以為涼粉一定好高卡路里,其實涼粉係一種草本植物,佢嘅熱量係好低架。加埋鮮果一齊食仲好味,因為新鮮生果屬高纖維食物,有助幫助腸道蠕動同消化。而另外涼粉從中醫角度睇係可以有助清熱,加埋生果一齊食就即刻感覺清新哂!不過提提 Sis 食涼粉最好走花奶,因為花奶既熱量相當驚人架,小心為妙。

 

雞蛋布甸 (約 100 卡路里*)

 

食完晚飯好似唔夠實在,心思思想食多小小野?諗唔到食咩甜品可以考慮下雞蛋布甸呀,大部份坊間整嘅份量都比較細杯,普遍味道都整到蛋味濃郁,同埋屬於比較低卡路里嘅甜品!細細杯食完都唔會有罪惡感,但記得食一杯好啦!

 

低脂乳酪雪糕 (約 110 卡路里*)

 

唔少 Sis 同小編一樣都好鐘意食凍冰冰嘅雪糕,但原來含脂雪糕每 100 克就有約 200 幾卡路里!而低脂乳酪雪糕就比較優勝,因為佢成份當中有益生菌同更多嘅水份,有益促進腸道健康,幫助消化,最緊要係佢都可以滿足你嘅口感。

 

西米露 (約 140 卡路里*)

 

西米係一種澱粉製成嘅加工米,同飯、粉麵等等差唔多性質,有飽肚既作用。而據說西米仲有健脾、化痰同補肺既作用,所以西米露絕對係一款唔錯嘅選擇!

 

南北杏雪耳燉木瓜(約 140 卡路里*)

 

雪耳功效非常多,除左我地成日聽嘅滋陰養顏外,仲有潤肺,生津同養胃。而木瓜有美容同減肥既功效,有助促進新陳代謝同抗衰老既作用,咁就可以Keep 住個靚樣啦!呢款甜品好味得黎仲要咁多功效。仲要一年四季都啱食,太吸引啦!

 

番薯糖水 (約 150 卡路里*)

 

番薯有個別名叫「長壽之王」,熱量低而膳食纖維含量又極高,健康得黎原來仲可以降低血液中嘅膽固醇同保持血管既彈性,甚至有預防癌症既講法添架!膳食纖維仲可以幫助排走宿便,真係高纖得黎又飽肚呀,佢絕對係糖水之中「有營」代表!不過小編建議番薯既比例要比糖水多,咁就可以攝取較少糖份嘅卡路里啦。

 

豆腐花 (約 160 卡路里*)

 

豆腐花健康又有美容功效,當中成份營養豐富之餘仲可令心臟健康!全因為豆腐花用黃豆制成,黃豆可以令細胞生長所以能抗衰老!小編就鐘意食時豆腐花落少啲糖水甚至唔落添,因為本身豆腐花已經好滑好好味!

 

* 每一百克份量所含有之卡路里

 

係唔係唔講都唔知原來食甜品都可以食得咁健康呢?不過食還食,記得要節制呀!始終食得多甜野都唔係咁健康架!

相信減肥對所有 Sis 都係一件好煩腦嘅事,包括小編自己都係!有時候減肥好多野都要戒口,仲要有好多野都唔食得添,油又話唔得,高澱粉質又話唔得,咁甜品又得唔得?原來得架!!!

當你見到甜品嘅時候究竟食定唔食好呢?甜品實在太吸引啦,但又似會好肥易喎…今次小編我就搵左幾款減肥都食得嘅甜品比大家,全因為佢地低卡又健康。所以就唔洗怕啦!