好多Sis用盡各種方法去減肥,但發現效果唔顯著,究竟係咩原因?作為都市人嘅我哋,返工放工都成日坐或者企喺度,少行下活動下,食物又偏鹹,咁就好容易會出現水腫呢個人人避之則吉嘅問題。如果你發現你按落小腿度時,凹個位要好耐先回復原狀嘅話,有可能真係水腫作怪啦!但點樣先可以有效去水腫?即睇以下4個重要秘訣,乖乖哋實行啦!

 

一、食多D去水腫食物

由食物入手去水腫可以話係無痛去水腫嘅方法,因為唔少食物都係好味又有益,適當咁進食就可以有效去水腫,何樂而不為先?咁食D咩好呢?睇下以下推介啦!

 

香蕉

 

香蕉嘅鉀含量好高,可以有效擊退水腫,仲有豐富嘅膳食纖維幫助排便。佢入面嘅鎂同維他命B都可以促進新陳代謝,簡直係集多樣好處於一身,點可以唔食呢?

 

紅豆 

 

紅豆去水腫嘅功效已經算係出晒名,好多人都會飲紅豆水嚟去水腫,不過如果D紅豆水係自己煲嘅話記得連埋渣食,因為連紅豆渣都食埋,可以幫助排便之餘又唔會致肥,一舉兩得!

 

綠色蔬菜

 

由於綠色蔬菜含有高鉀,所以食多D綠色蔬菜都有幫助,例如菠菜、西芹、西蘭花等等。不過記得煮嗰陣盡量少鹽,唔係就得不償失啦!

 

二、少飲咖啡或茶

 

雖然咖啡同茶都有利尿作用,但如果完全用咖啡同茶代替水反而會因為過量排尿而積聚毒素!所以記得飲咖啡同茶之餘每日要飲返幾杯水先得!如果唔鍾意飲水,可以響清水入面加少少檸檬汁。檸檬含有豐富維他命C、B1同B2,可以幫助維持人體嘅新陳代謝添!

 

三、少食生冷、加工食物

 

諗住去水腫,食多D沙律實冇死?其實都唔得架!生冷嘢會損害到脾胃,反而會引致水腫出現,所以都唔好食咁多。而好多加工食物,例如醃肉、罐頭食物等等,本身已經落咗好多鹽,而高鹽又係水腫嘅主因,所以都係少食為妙。而且平時食嘢唔好咁重口味,低鹽、低糖、低油就更好啦!

 

四、做運動、拉筋去水腫

 

做運動可以促進血液循環,每星期跑兩三次步或者做下瑜珈等等都係一D好好嘅運動。平時返工真係要長坐或者長企嘅Sis就盡量每一兩個鐘換下姿勢,坐或者企喺度時都可以搵機會郁動下腳嘅關節位同拉下筋。而每日行到8000步左右嘅話,對去水腫都有幫助架。

 

以上幾個秘訣睇起上嚟好容易,不過最難都係點樣養成習慣。同埋唔好以為水腫就要飲少D水,都係唔得架!飲水對女性嘅健康嚟講係好重要,所以每日都要飲返大約八杯水先得架!

 

你可能感興趣:

懶人瘦身靠蒸腳? 嚴選 5 個蒸腳好地方

頸梗膊痛速速走!5 間必試肩頸按摩推介

好多Sis用盡各種方法去減肥,但發現效果唔顯著,究竟係咩原因?作為都市人嘅我哋,返工放工都成日坐或者企喺度,少行下活動下,食物又偏鹹,咁就好容易會出現水腫呢個人人避之則吉嘅問題。如果你發現你按落小腿度時,凹個位要好耐先回復原狀嘅話,有可能真係水腫作怪啦!但點樣先可以有效去水腫?即睇以下4個重要秘訣,乖乖哋實行啦!