農曆新年好快就到,應該唔少Sis都好期待到時除咗可以放個長假之外,仲可以大吃大喝一番!不過咁就危險啦,隨時放完個長假就畀同事問係咪新年太好食好住,成個人肥晒!咁唔通新年要戒口唔食賀年食品咁慘?!咁又唔使,其實只要袋穩以下嘅新年keep fit tips,咁就唔使怕新年咩都冇得食啦~

 

一、煎炸食物食少D

 

係人都知煎炸食物係最邪惡嘅,又香口又好味,細細件咁嘅話仲會好易一口接一口,不知不覺就食咗好多!特別係新年,有唔少香口嘅煎炸賀年食品,例如煎堆、笑口棗、角仔等等,食嘅時候記得每日都係一件起兩件止,仲要時刻提醒自己,呢D煎炸食物唔止會令皮膚差晒同容易生暗瘡,佢哋分分鐘係由一D翻用嘅食油炸出嚟,仲會影響健康,咁就警惕到自己去抗拒誘惑啦!

 

二、糕點配茶助消化

 

農曆新年又點可能唔食糕點?年糕、蘿蔔糕、芋頭糕等等,應有盡有,點忍到口?想食得健康D嘅話,最好就係自製糕點,咁就材料同糖份都可以自己因應咁減少,或者換走D高脂肪配料,例如可以用冬菇代替臘味咁。如果自製唔到咁點好?食嘅時候就最好係蒸佢,唔好煎~再加多杯茶,例如普洱、烏龍茶咁,幫助消化之餘仲可以解膩~

 

三、識食盆菜最低卡

 

新年最開心就係成家人一齊分享盆菜,盆菜入面咁多嘢揀,點食先keep到fit?識食最好就係揀海鮮嚟食,海鮮類嘅食物一向都比較低卡路里,食多D都唔緊要~其次就係要食多D菜,補充返D纖維,有助腸道健康,增加飽肚感,減肥都work D啦~另外記住唔好食咁多容易索汁嘅食物,例如豬皮、豆卜等等,因為D汁多數都係高鹽高油,少食為妙!

 

四、果乾、果仁代替賀年糖

 

要新年過得甜甜蜜蜜,賀年糖果當然都唔少得,好似糖冬瓜、糖蓮子同糖蓮藕等,但食得多精製糖,唔止會影響減肥成效,仲會加速衰老!想避免嘅話,最好就係改用無添加糖嘅果乾代替,咁就食得健康又有天然果糖滿足到大家對糖分嘅追求。仲係口痕嘅,不妨食無添加鹽同油嘅果仁代替!

 

想新年滿足一時嘅口腹之慾得嚟又唔會令體重直線上升,就要記住小編以上嘅4大tips,謹記凡事節制,就食得健康D,減肥大計都有效D啦!

 

農曆新年好快就到,應該唔少Sis都好期待到時除咗可以放個長假之外,仲可以大吃大喝一番!不過咁就危險啦,隨時放完個長假就畀同事問係咪新年太好食好住,成個人肥晒!咁唔通新年要戒口唔食賀年食品咁慘?!咁又唔使,其實只要袋穩以下嘅新年keep fit tips,咁就唔使怕新年咩都冇得食啦~