新年新形象 2018 年 4 種必試魅惑眼影

好多Sis化眼影時都會play safe用返D深啡、大地色嘅眼影，廢事唔識用搞到眼腫腫咁，不過嚟到2018年，不妨試下大膽挑戰其他顏色，特別係今年嘅流行色，睇下邊隻色啱自己之餘又跟得上潮流啦～

 

一、紫色

 

紫色，特別係宇宙紫，簡直係今年嘅最火熱嘅顏色，因為佢係畀Pantone選中做今年嘅年度色架！咁各大品牌當然就出咗唔少用紫色做主調嘅眼影啦，當中仲不乏包含幾種唔同紫色色調嘅眼影盤～用深紫色眼影，個人會增添神秘感，而淡紫色嘅話就反而會增加甜美度，幾隻色買晒都唔過份啦！

 

 

二、粉紅色

 

粉紅色嘅眼影最啱就係皮膚偏白嘅Sis，搽完之後會畀到人一種清新、鄰家女孩嘅感覺，所以都係一隻歷久不衰嘅色調嚟～即使剩係買單色眼影都做到好好嘅效果！如果搽嘅時候唔係太大範圍，又適當咁搽少少喺臥蠶位嘅話，仲會更顯精神～咁粉嫩清新嘅顏色，話唔定仲會幫你帶嚟桃花運！

 

 

三、酒紅色

 

夜晚比較多聚會、節目嘅Sis比較適合用呢隻酒紅色嘅眼影，呢隻色帶到畀人嫵媚嘅感覺，落到club即使燈光昏暗，隻色都係咁突出～酒紅色配搭埋淺啡、淡金色嚟用嘅話，感覺會比較柔和，仲百搭D添，唔怕會失手！

 

 

四、橙啡色

 

用大地色用到悶？今年最流行就係帶橙色嘅啡色，用完之後個人冇咁死氣沉沉，會帶返點朝氣～要駕馭呢隻色，最好就係用深淺唔同嘅橙啡色畫出層次，大範圍用淺色，眼皮摺位就用深色，咁就可以做到放大隻眼，又增加清新可愛度嘅效果啦～

 

 

 

以上幾隻今年流行嘅眼影色真係隻隻都咁靚，各位Sis不妨去各大化妝品櫃位試下邊隻色啱自己，然後買返屋企幫自己打造今年最新嘅魅惑眼妝，增強下自信心，精神奕奕咁為新一年拼搏啦！