有時明明天氣唔算好乾燥,自己又有飲嘢,但係唔知點解成日都覺得口乾,皮膚又好似唔多夠水咁,感覺唔夠飽滿有光澤,究竟係邊個偷走身體嘅水,搞到咁乾爭爭?元兇可能就喺你身邊,即刻睇吓呢6個疑犯,邊個搞到你口乾乾!

 

1號疑犯:咖啡

 

打工仔幾時都要提神,於是就習慣一眼瞓就飲杯咖啡,雖然係飲品,但就係會帶走你水份嘅飲品!咖啡內含嘅咖啡因雖然有助提神,但同時有利尿作用,所以飲完咖啡喉嚨有時都會涸涸地。如果想飲咖啡提神的話,一日飲一杯都還可以,不過之後最好都記得要補充多d水份,如果可以的話,揀低咖啡因含量嘅咖啡代替都係唔錯嘅選擇。當然啦,能夠飲少d就更好!

 

2號疑犯:茶

 

唔少人唔鍾意水淡茂茂,所以以茶代水,如果你都係咁,你就要留意,飲茶過多可能反而帶走你身體嘅水份,因為茶同咖啡一樣,都有咖啡因,具利尿作用,飲少少係冇問題嘅,仲有生津止渴嘅作用,但如果一日飲3-4杯以上,或者沖得好濃,攝取嘅咖啡因就會過多,結果補充唔到足夠水份,仲會帶走更多水,以茶代水真係可免則免。提提你,奶茶都係茶,一樣要少飲啊~

 

3號疑犯:酒

 

「吓!酒都有咖啡因?」NoNoNo!酒冇咖啡因,但酒精有利尿作用,一樣會幫你將身體嘅水份排出體外,所以飲完酒好多時都會成日去廁所,容易感到口渴。同樣地唔想個人咁乾,就記得唔好成日飲酒,真係飲的話,之後都記得要多d補充水份。

 

4號疑犯:煎炸食物

 

煎炸食物都係兇手嚟架,皆因食物經過煎炸之後已經冇乜水份,而油份就極多,落到肚自然唔會提供到水份之餘,仲會吸走體內嘅水份,消耗體內嘅津液,令陰陽失衡,陽氣過盛,就會形成熱氣,自然就會口乾舌燥。

 

5號疑犯:冷氣

 

吹冷氣會乾應該好多姊妹都知,尤其是返寫字樓嘅姊妹,差唔多全日都留喺冷氣房,返到屋企可能又開冷氣,幾乎全日都完全冇接觸過新鮮空氣。冷氣會抽走室內水份,長期stay喺冷氣房,濕度咁低,自然人都乾埋,所以記得有機會就要俾自己呼吸新鮮空氣,喺冷氣房擺個放濕器都有一定用處。

 

6號疑犯:夜貓子

 

做夜貓子捱更抵夜又係會損耗陰津,會令你體內滋潤身體嘅津液減少,引致虛火,就好容易搞到個人好乾咁,所以夜晚到就去搵周公幫你提防偷水賊啦~

 

唔想個人咁乾,捉走呢6個賊,多飲清水,少飲各式各樣嘅飲品,覺得味寡的話,喺水入面加少少新鮮檸檬汁~加上保持良好生活習慣,多食蔬果,個人自然冇咁dry!

 

你可能感興趣:

無濕一身輕 踢走濕氣3大法

4招消滯解膩 復活腸胃

香港 4 間必試正宗泰式按摩

 

有時明明天氣唔算好乾燥,自己又有飲嘢,但係唔知點解成日都覺得口乾,皮膚又好似唔多夠水咁,感覺唔夠飽滿有光澤,究竟係邊個偷走身體嘅水,搞到咁乾爭爭?元兇可能就喺你身邊,即刻睇吓呢6個疑犯,邊個搞到你口乾乾!