最近開始見到街頭多咗唔少落葉,即係秋天都開始悄悄嚟到喇~夏末秋初呢d轉季日子,天氣唔穩定,自然都影響到健康、皮膚飄忽不定,容易病、皮膚又可能易敏感、乾燥甩皮咁,小編今次就講吓點樣由飲食入手,養出健康身體同靚靚皮膚,減低轉季帶來嘅唔穩定狀態!

 

減少煎炸熱氣嘢

 

夏末秋初,天氣仲係熱,但又不失秋天嘅燥,如果再成日食d熱氣野,例如薯片、煎炸食物等,等於自己增加身體嘅燥熱,連埋天氣帶嚟嘅燥熱,燥熱double up,個人自然容易喉嚨痛、口乾,甚至身體易發熱,好容易病;皮膚方面,亦都容易因為太熱氣而生暗瘡、水油唔平衡,所以都係食少d熱氣嘢啦~

 

少辣免上火

 

無辣不歡嘅sis就要留意,辣又係好上火架,所以喺咁燥熱嘅天氣下,最好就唔好食咁多辣嘢喇,同煎炸食物一樣,以免身體過於燥熱,容易病之餘,對皮膚又唔好。

 

多飲水、少凍飲

 

呢個時候,秋燥開始慢慢滲入熱辣辣嘅夏天,要記得多d補充水份,唔係就更易皮膚乾、喉嚨乾,甚至喉嚨痛同便秘。覺得飲水寡,又或者覺得天氣仲熱,想飲凍嘢?最好唔好啦~凍飲傷脾,對身體唔好架!同時因為夏天去到尾聲,唔駛特別食太多消暑清熱食物,好似西瓜、涼粉咁,唔係就會傷身架喇~

 

滋陰潤燥食物可多吃

 

咁多嘢唔好食,咁應該食d咩?秋燥易傷肺,所以最好食d滋陰潤燥嘅食物,尤其是潤肺,好似雪耳、百合、梨、蓮藕、淮山等,潤個body之餘,仲潤埋膚,皮膚都靚d架。怕麻煩或者唔識煮的話,簡單d,冰糖雪耳燉雪梨就啱晒,又易整又好味,唔要雪梨,轉木瓜一樣得!

 

 

做法真係勁簡單,預備1個雪梨(或者木瓜,睇吓你喜歡邊一種)、1朵雪耳(或者半朵,視乎大細同喜好),用清水浸雪耳浸到軟身為止,然後剪走個蒂,其他剪成細塊;雪梨/木瓜就洗乾淨,去皮、去核、切塊(大塊d都得),跟住就將佢哋掉落燉盅,加適量清水,就可以拎去用慢火隔水燉大約個半鐘,然後加適量冰糖調味。

 

如果覺得燉都好麻煩,唔識點做,再簡單d,同上面一樣嘅處理方法,但就用煲嘅方法,好似一般糖水咁煮法就可以,水量就記得要比燉嘅多喎,時間就唔駛太耐,煲滾後轉中細火,煲約大半個鐘至1個鐘就OK!

 

呢個糖水真係超簡單,但記得唔好落太多糖,太甜就失去咗佢原有嘅益處架喇!

最近開始見到街頭多咗唔少落葉,即係秋天都開始悄悄嚟到喇~夏末秋初呢d轉季日子,天氣唔穩定,自然都影響到健康、皮膚飄忽不定,容易病、皮膚又可能易敏感、乾燥甩皮咁,小編今次就講吓點樣由飲食入手,養出健康身體同靚靚皮膚,減低轉季帶來嘅唔穩定狀態!