冬天一到,唔少人都會手腳冰冷,尤其係女士們!雖然香港冇落雪嘅地方咁凍,但因為係濕凍嘅關係,就算著幾多衫都好似唔夠暖咁!唔使驚~依家驅寒有計!跟住小編嘅方法,就唔使成日請朋友或者另一半食「凍柑」啦~

 

必備暖水、薑茶!

 

成日都聽每日要飲夠8杯水,但冬天想保暖驅寒就梗係要飲暖水!暖水可以為身體補充水分之餘,亦可以促進血液循環,提升體溫。覺得飲水口淡淡想飲其他驅寒飲品?薑茶幫到你!薑茶可以幫助驅散體內寒氣、暖胃、養顏、增強抵抗力並預防感冒添~薑茶有多款做法,例如桂圓紅棗薑茶、檸檬薑茶同蜂蜜薑茶等,簡單易製,總有一款啱你口味!

 

浸腳可以暖身

 

對腳係距離心臟最遠嘅地方,經常都會因為供血不足而冰冷,為靚而著短裙短褲嘅女仔更加會由雙腳開始積累寒氣。雖然喺香港唔係家家戶戶都有浴缸可以浸浴,但只要有個盆,即使係浸腳都可以令你全身都暖~簡單嘅浸腳可以改善血液循環同行氣活血,配合適當嘅中藥浸泡更有療效!不過浸腳時間唔適宜咁長,15-30分鐘就已經足夠,水溫就維持喺攝氏40左右。浸完後成身暖晒,夜晚仲會好好瞓添~

 

咩穴位可以驅寒?

 

喺中醫嘅角度,認為體內寒氣累積,陽氣虛弱先會令到手腳冰冷。只要經常按摩以下嘅穴位,就可以疏通經絡、促進血液循環同新陳代謝。

 

勞宮穴:勞宮穴位於手掌心,先一手握拳,然後逆時針搓揉勞宮穴10分鐘左右,再交替手重複動作。唔用握拳方法嘅話,用按壓方式按摩勞宮穴都可以。

湧泉穴:湧泉穴喺腳掌心上三分一左右,用手掌搓揉湧泉穴100次,然後再搓揉各腳趾100次。堅持每日早晚各一次咁樣就可以改善手腳冰冷嘅情況同埋補腎固元。

大椎穴:大椎穴位於頸後最突出嘅骨下,先搓熱雙手,再按摩頸後嘅大椎穴,唔單止可以舒緩頸椎嘅疲勞,亦可以逹至驅寒嘅效果~

 

有咗以上幾個方法,今個冬天再凍都冇有怕!仲可以慳返D暖包同暖貼~快D分享比怕凍嘅閨友同好友,等佢哋都學返幾招旁身啦~

冬天一到,唔少人都會手腳冰冷,尤其係女士們!雖然香港冇落雪嘅地方咁凍,但因為係濕凍嘅關係,就算著幾多衫都好似唔夠暖咁!唔使驚~依家驅寒有計!跟住小編嘅方法,就唔使成日請朋友或者另一半食「凍柑」啦~