相信好多人都聽過「食凍嘢好傷身,尤其是女仔呀」,但係天氣熱就好難抗拒凍飲、雪糕雪條、刨冰等等,食完果股涼快嘅爽度實在令人欲罷不能。勉強迫自己戒口真係好痛苦,但其實要食都唔係問題,只要食得smart,就可以滿足到自己慾望,同時又唔會太傷身,等小編俾4個小貼士大家應付冰品誘惑啦!

擇個好時辰 凍嘢冇有怕

 

想食凍嘢冇問題,但記得要好似結婚咁擇個「吉時」!而「吉時」就係中午時段喇~點解呢?以中醫角度嚟睇,人體係有陰氣同陽氣運行,陽氣喺我哋早上起身嘅時候開始慢慢上升,去到中午時段(約12 – 2點)就係升到一日入面最高嘅時候,呢個陽氣最旺盛嘅時間食凍嘢相對嚟講係最唔傷身嘅。
咁同樣道理,由於陽氣同我哋喺早上起身嘅朦朧狀態差唔多,先剛開始甦醒運作,比較微弱,呢個時候就最好唔好食冰凍食物,刺激腸胃,食個熱辣辣早餐先係最好,例如湯粉麵、粥、熱飲等,等身體有d熱嘢warm up吓。而過咗中午之後,陽氣就會慢慢由最高點開始下降,到夜晚就會越來越弱,變成陰氣較強,所以晚上亦都唔適宜食凍嘢,好傷身架。

 

控制份量同溫度 少吃多滋味

 

雖然就話中午食凍嘢冇咁傷身,但都唔代表可以成日食、食好多同食到超級凍,控制吓自己食嘅份量、頻密同冰凍嘅程度,滿足咗自己涼爽吓就要停,畢竟太多太凍嘅食物無論幾點,落到肚都傷腸胃~俾幾個生活例子大家參考吓:

– 凍飲叫少冰/走冰,或者自己舀走過多嘅冰;

– 攤一陣等凍飲/凍食冇咁冰冷先飲/食;

– 喺嘴入面含一陣等冇咁凍先吞,減低冰冷程度都有少少幫助;

– 避免一次過食太多冰品,例如飲咗凍檸茶就唔好跟住又食多杯雪糕;

– 非常冰凍嘅食物,好似雪糕同刨冰要盡量少食,偶一為之就好。

 

停一停 諗一諗

 

冰品之所以咁容易誘惑到我哋,好多時係因為果一刻覺得好熱而衍生嘅衝動,因為想即時令自己降溫嘛,但其實唔一定食凍嘢先有呢個效果。想食之前,停一停,諗一諗,可以的話洗個面,或者抹乾汗水,吹一吹風扇、涼一涼冷氣休息吓先,尤其是香港有咁多冷氣商場,涼冷氣真係易過借火。等個人冇咁熱,想食冰嘅慾望自然會下降,呢個時候,只要飲杯水,可能更舒服。

 

忍口時忍口 唔好有藉口

 

最後就係要謹記自己身體情況,唔好係又食唔係又食,例如傷風感冒中、經期前後、氣管敏感、呼吸道有毛病等狀況出現,就無論係幾點都唔應該俾自己任何藉口去食!千祈唔好諗住「以毒攻毒」或者「食少少唔怕啦」,咁樣只會令自己身體狀態差多兩錢重!女仔經期期間更加要避免,經期時身體比較虛,食凍嘢會令你又虛又寒,又影響氣血,點都要忍口呀~

 

夏天面對住咁多冰凍飲品同甜品嘅誘惑係好難完全抵擋,但只要嘗試跟住上面嘅貼士,慢慢建立咗自控能力,形成咗習慣,就會發現其實食少d冰都唔係真係太難~

 

*如果你身體本身係比較虛寒的話,最好都係唔好亂食,先向中醫師查詢,並遵從醫師嘅建議。

 

你可能感興趣:

跳出5個減肥陷阱 減出健康體態

4招消滯解膩 復活腸胃

無濕一身輕 踢走濕氣3大法

相信好多人都聽過「食凍嘢好傷身,尤其是女仔呀」,但係天氣熱就好難抗拒凍飲、雪糕雪條、刨冰等等,食完果股涼快嘅爽度實在令人欲罷不能。勉強迫自己戒口真係好痛苦,但其實要食都唔係問題,只要食得smart,就可以滿足到自己慾望,同時又唔會太傷身,等小編俾4個小貼士大家應付冰品誘惑啦!